Wanda is van jongs af betrokke by musiek en wen reeds op 7-jarige ouderdom ’n landswye talentkompetisie. Sy haal die semi-finale rondtes in Debuut en Crescendo, en tree verskeie kere in die Staatsteater op saam met Jannie du Toit, Laurika Rauch en Christa Steyn. Na haar eerste CD getiteld, ‘U laat my leef’, vrygestel is, onderneem sy verskeie toere saam met Manuel Escorcio, Oscar Ehrensperger, Jan de Wet en Piet Smit, asook die internasionale kunstenaars Don Francisco en Steve Green.
Sy ontvang twee ATKV Liertoekennings in 1996 en 2000, en word in 2000 deur die CBSA aangewys as beste gospel sangeres. In dieselfde jaar is sy ook ’n finalis by die SAMA toekennings in Sun City.
In 2004 begin Wanda om die HEELvrou seminare saam met Louise Fourie aan te bied. Tans is sy ’n gewilde spreker, gaskunstenaar en radio- en TV-aanbieder, onder andere op die dames joernaalprogram, ‘In die spieël’ op Radio Kansel, ‘Kyk Nuut’ op Rhema TV, ‘Hosanna’ op SABC2, en ‘In Pas’ op KykNet. Wanda is ook een van die aanbiddingsleiers by NG Gemeente Moreleta in Pretoria